“ ‘A casa, ‘o genovese nun t’invita:
tutt’o cuntrario d’o napulitano”.
(Luoghi comuni: nunn’è mai finita,
ma puverielle: veneno ‘a luntano…)

Sta invece ‘e casa ccà, la genovese,
ma certi vote resta un po’ indigesta.
Chistu Genoa tene assai pretese:
e c’a vulesse arruvinà, la festa.

L’ansia è presente, pure si se finge
ca nun ce sta. Allegri è schiattamuorto:
“Chi lo sa, forse il Napoli non vince…”
Massimilià, spiacenti: tiene tuorto!
Certo, nun simme chiù accussì brillanti,
ma la città pò esse sodisfatta;
simme cuntate, nun ce stanno santi
(si ce stesseno, ‘a cosa fosse fatta!)

‘O miracolo? Amice, bona gente:
nun verite ca già l’avimmo fatto?!
Jà: site ingorde, nun v’abbasta niente!
‘A stu mumento, sulamente un matto

po’ parla di staggione deludente.
E’ inutile ca ce girammo in tondo:
pure si a maggio nun vencimmo niente,
chest’anno s’è sognato fino in fondo!