Comme manovra, simme meglio ‘e lloro.
Stu Napule fa ‘o toro, anzi, ‘o torello,
ogne passaggio è nu capolavoro;
ma chello ca ce manca, è  ‘o grimaldello

pe stanà ‘e bianconere ‘a dint’o forte.
Adderittura, passano in vantaggio:
Rafael (sempe tu? Mannaggi’a morte…
Invece ‘e c’aiutà, ce faje rammaggio!)

E nuje? Simme sincere: poco e niente.
Loro stanno tranquille a c’aspettà,
ma ‘e nuoste tentative so’ impotente.
Sta Juve ce cuntrolla, ce fa fà:

ce fa attaccà, però nun s’appaura.
E’ comme se dicesse: “Adda sfucà:
ma che male po’ fà, chesta criatura?
Allucca, votta cauce, a mammà…”
Facimmo un po’ di più, nella ripresa:
segnarrà pure Marek, ‘o slovacco.
Juve, miettete scuorno! T’e difesa,
tu ce vulive fa sultanto ‘o pacco.

Giuda vicino a te nunn’è nisciuno,
Higuain, ca de nomme faje Gonzalo…
Ncopp’a maglietta scrive: Sittantuno,
ca tu e chell’ommo, site tale e (s)qualo!