CROTONE-NAPOLI 1-2
23-10-16 - categoria Poesie in napoletano 2016-2017Abracalabria! Né, fernette ‘a crise
ch’e tre punte pigliate c’o Crotone?
Ncopp’a sti facce tornano ‘e surrise:
overo se n’è ghiuta ‘a depressione?
Sì e no. Pecchè contr’e calavrese
-su vintisette punte, uno soltanto! –
simme scise a jucà ch’e nierve tese.
Gabbiadini (si tanto me dà tanto:
ma nun dà niente), reagisce a un fallo,
d’e crotonese, e l’arbitro n’o caccia.
Manolo, ma chi sì? Chest’è nu giallo:
anzi, nu rosso. I’ te sputasse ‘nfaccia…
A stà nu tiempo intero c’uno e meno,
(ma Gabbia già all’inizio nun ce steva),
è comme si jucassemo c’o freno:
però ‘o Crotone niente ce puteva.
Guariti o no? C’o diciarrà Turino.
Pe nuje, là ncoppa, perdere è normale.
Ma nun te lusingà, né juventino:
e si stavota te facimmo male??