Mo’ dimm’a verità: nu l’e penzato,
quanno facette gol chillu Petagna:
“Mo’ a st’Atalanta ‘o Napule s’a magna:
s’adda pentì d’o gol ca c’ha signato!”

Ma ncopp’o campo, ‘o ciuccio sta distratto.
Hamsik è stanco muorto, e nunn’incide:
chelli soje geometrie, degne di Euclide
nun se vereno chiù, tutt’a nu tratto.

Ce vo’ na spiegazione. D’a stanchezza
accumulata contr’e portoghese,
‘e nuoste ancora nun se so’ riprese:
pe chesto, anno jucato na schifezza?
Ma forse stu penziero nunn’è esatto.
All’ “Azzurri d’Italia”: ‘a casa lloro,
nuje ce simme assentate dal lavoro:
‘a squadra nosta nun c’è ghiuta affatto.

Perdere na partita ce po’ stà,
specialmente – dicimmolo! – si è ‘a primma:
ma purtroppo jucaimo na zozzimma.
E’ perdere accussì, ca fa ncazzà!

E’ lassà sti tre punte a chesti ccà,
ca songo, assieme c’o Verona, e ‘o Chievo,
-nunn’o vulesse dicere: ma devo –
‘e chiù razziste ‘e tutt’a serie A!