“Avite visto? Addosso al Presidente!”
Doppo Pescara – qual  è ‘a nuvità? –
quaccuno  accummenciava  a murmulià:
ce ne sta sempe troppa, ‘e chesta gente.

Muzzecatev’a lengua! Cu Montella
(ca stu Milan comunque l’ha cagnato),
‘o Napule s’è mosso: s’è scetato.
Fuje na partita overamente  bella:

Milik, e pienz’a “milk”: ‘a tazz’e latte
ca le facette ‘o fisico d’atleta:
isso nun tene ‘a panza, nu sta a dieta.
Nun song’e chile, chille ca cumbatte,

ma l’avversarie. ..‘O ffà cu na doppietta,
ca spara a tutto campo. E se dimane
arrivasse in città pure Cavani?
Nu colpo ‘rosso, ‘o pubblico l’aspetta…Però a nuje chesta cosa nun ce sona.
‘O Matador è aiere: acqua passata.
Pe mò, stammo vivenno alla giornata:
chesta, ‘a siconna, c’è risciuta bona.

Belli nutizie pure d’o surteggio,
c’a Turchia, ‘o Purtuallo e l’Ucraina.
Vencere sarrà  ‘a meglia  medicina:
putevemo piscà paricchio peggio!