Succere, ca na squadra pezzottata
-no nuje: stammo parlann’e l’Udinese –
ca jeva sotto quatto vote ‘o mese,
tuttassieme, ecco qua: risuscitata!

Succere (e proprio chest’ è l’occasione),
ca na squadra temuta e blasonata
venette pe’ sunà, ma fuje sunata,
e turnaje cu tre reti sul groppone.

Chello ca invece nu se po’ verè
è n’ Higuaìn pigliat’ all’isteria.
Sarrà squalificato, e così sia:
quatto jurnate, si va buono, tre.

Peccato pe Gonzalo, l’argentino:
‘o puteva raggiungere, Angelillo,
e invece l’è venuto nu sturzillo,
pecchè è nu poco troppo fumantino.
Ma soprattutto, chello c’ha sbagliato
è Sarri: ‘o nuosto grann’allenatore,
ch’a parlato cu arraggia e cu rancore
quanno alla fine l’hanno intervistato.

Nun può dicere – scusami, Maurizio! –
c’a semmana passata, anche Bonucci
aveva essere espulso….Sti mezzucci
level’a miezo. Chesto brutto vizio

d’allamentarse, lascialo ‘e cruniste:
a Palummella, Auriemma, oppure Alvino,
o a me: nuje sì, putimmo fà  casino
(ah, chiste beneritte jurnaliste!)

Tu no. Tu ea mantenè dritto ‘o timone;
ea sta calmo, si ll’ate so’ nerbuse.
Invece tu sì ‘o primmo ‘ e  ll’incazzuse:
e li ccose accussì nun vanno buone.

Aviva dice: “S’è jucato male
in tutti e tre i reparti. E chest’è tutto.
Maje s’era visto un Napoli chiù brutto:
‘a figurella è stata generale”.

Ma ‘o generale nuosto, oi Sà, sì tu!
Epperò, si te miett’ a prutestà
pe’ difennere ‘e sbaglie, e ad alluccà,
sicuramente nun ne ascimmo chiù!