“Se cagna tutto, pe nun cagnà niente”.
Sti parole d’o principe ‘e Salina
hanno ispirato ‘o superpresidente
d’o Palermo: Maurizio Zamparini.

Nunn’è nu siciliano, e manco un sardo:
d’o Friuli è arrivato fin’a ccà,
e l’è piaciuto troppo, ‘o Gattopardo:
pirciò ‘o Palermo mò sta comme sta…

Pe’ isso, a licenzià l’allenatore
(so’ sette: ‘o primmo e l’ultimo, Iachini),
è comme fosse juto a magnà fore,
è comm’a cunsultà na  list’e vini.
L’aspettajmo, sul prato d’o Barbera,
‘o Palermo: ma nun s’è apprisentato.
Però- l’avimma dicere – stasera
pur’o Napule steva ‘mbambulato.

Nu poco scumbinato, non convinto,
comme si ce facesse nu favore;
nisciuno ‘e lloro c’a vuttasse ‘a dinto.
Pirciò, benedicimmo stu rigore

ca ce steva sultanto pe’mmità.
Diceva Boskov, vecchio allenatore:
“Rigore è quando arbitro dà”.
Pe chesto te chiammave  prufessore!

Dummeneca ce serve nu rialo
dalla squadra granata: d’o Turino.
Si cu lloro la Juve acchiapp’o palo,
allora sì, s’arape nu casino!