T’e chiuruto là addreto, oi mamma mia:
vabbuò. Ma doppo nun t’ea allammentà
si ‘a stampa te fa niro, né Garcia
(o, comme certi dicieno, Garcià).

Manco nu tiro ‘e fatto dint’a porta,
tu, Roma, ca vulive fa sfracelle
tre mise fa: tien’a memoria corta?
‘Oi lupi, so’ fernute ‘e tiempe belle,

te so’ rimaste sulo ‘ e tiempe cupe!
‘O Spezia (!) te vuttaje fora d’a Coppa,
e mò ‘e tifose tuoje so’ propio stufe:
‘e pacienzia già n’hanno avuta troppa!
Unnece cacasotto: chesto site,
ve vulite ‘mpiccà? Ve dammo ‘a funa:
si nunn’ammo signato, lo capite
ca fuje sulo quistione di sfurtuna?

Hamsik ca fa cilecca pe doje vote,
e Insigne, s’adda dì: tropp’egoist.
Chesti partite ccà vanno risolte:
cu l’Atalanta nun ce stanno crist!