Chievo e Genoa c’avevano pruvato
a giucà: e ‘o Sassuolo ce riuscette.
Invece stu Verona ha rinunziato
‘a subbeto. Sta là, ch’e pacche strette:

Capuleti e Montecchi ammuntecchiate,
appaurate, nchiuse dint’o forte.
L’azzurre nuoste s’anno scuraggiate:
comme l’amma stanà, mannaggi‘a morte?

Verona, jà: ma nun te miette scuorno
‘e sta tattica timida e passiva?
D’e tribune se sente nu taluorno:
“Primm’e murì, dimostra ca sì viva!”
Giulietta: tu l’e fatte imbestialì,
‘e paesane tuoje. Te pare bello
(e po’ dice ca zoccola nun sì…)
che a Insigne ‘e fatto l’uocchie a zennariello??

L’anno passato, in gare comm’a chesta
avessemo sufferto: e forse perso.
Mò invece no: nunn’abbassammo ‘a cresta,
ogge l’atteggiamento è assi diverso.

Primma Lorenzo, e doppo isso: ‘o Pipita
segnano, e cagn’e segno la jurnata.
Distruggere ‘o Verona: chest’è vita!
Mo simme primme…tutta la serata!