Contr’o Cesena, ch’è già retrocesso,
stu Napule è ‘o fantasma di sé stesso,
anzi no: è propr’isso, al naturale,
e stu fatto ce fa davvero male.

‘O Cesena – e sta cosa nunn’è bona –
ncopp’o campo ce pare ‘o Barcellona:
fraseggia scenne scambia, in gran controllo.
‘O Napule passeggia, muollo muollo:

‘o centrocampo? Comme nun ce fosse.
Pur’e pulece tengono la tosse:
è accussì c’o francese d’o Cesena
fa doje rete. Maronna mia, che pena!

Mo’ crollammo, è sicuro. Me l’aspetto.
Pe fortuna tenimmo a nu folletto
ca corre, scatta, tira a tutto spiano:
Mertens, ‘o belga chiù napulitano

ca nc’esiste. Pe ll’invenzione sue
alla fine vencimmo tre a due.
E’ arrivato ‘o mumento ‘e fa doje cunte.
Si pure remanessemo a tre punte

dalla Lazio, nell’ultima jurnata,
c’a sapessemo dà, chella mazzata?
I’ dico: no. Ma spero ‘e me sbaglià.
Benitez, accummencia a salutà!