‘E parl’e te nun tengo chiù gulio:
d’o terzo posto sì caruto (sigh!)
‘o sesto. E mò chest’è, Napule mio:
a stiento trase nell’Europa Lig.

Mò fatte piglià pure d’o Torino,
ca cinche punte  o ssaje ca nu so’ niente:
‘a Lazio ce facette lu strascino,
c’ha distanziato in modo sorprendente.

E che dicere ‘e Samp e Fiorentina?
Doje granne squadre, chiene di campione…
La resa dei (tuoi) conti s’avvicina,
Benitez. Ne tenisse, di occasione

pe’ rimettere allerta sta baracca,
pecchè ‘a fatica toja nun se disperda:
ma stammo fin’o cuollo dint’a cacca
(è na manera pe nun dice …..)

‘A squadra joca, sì,  ma fa pe’ finta.
Se vere: ncopp’o campo nun ce sta.
‘E raggia nun ne tene,  manc’a a grinta
(na vota se chiammava “intensità”).
Comm’o cane assumiglia a lu padrone
tanto na squadra fa cu chi l’allena:
Napule, tu sì troppo bonaccione,
paura nun ne faje: faje sulo pena!

Ancora poche juorne, e simme fore
da tutto: sia mazziate ca curnute.
Na preghiera pe’ Rafa e jucatore:
si ‘e tenite, cacciate l’attribbute!