VERONA-NAPOLI 2-0
15-03-15 - categoria Poesie in napoletano 2014-2015A Verona pe’ nuje, dulur’e panza:
ma pare chiù importante la valanza.
Ancor’e chiù d’e gol c’avimme prese,
subbimmo, d’e tifose veronese
overo na pesante umiliazzione:
‘a Benitez ‘o chiammano “grassone”.
Spiegatancello buono chistu fatto:
a sfottere a qualcuno pecchè è chiatto
-e a farlo tuttequante assieme: in coro –
in Italia ce stanno sulo lloro…
Mò stateme a sentì: parla ‘o cronista.Ottantasette, un anno di conquista:
vencettemo ‘ o scudetto. Quanta lodi!
Però pure chell’anno, al Bentegodi
fuje nu calvario, na tragedia overo:
‘o Napule perdette tre a zero.
E che cosa allucavan’e perzone
a Maradona? “Dàghela al pansone!”*
Anzi: “al panson”: pecché la “e” finale
là nun se dice, è legge generale.
Oggi ‘o Napule (pozza murì acciso)
è paruto na squadra senza piso:
na squadra affaticata, molla molla,
comme si fosse fatta ‘e pasta frolla.
Nun le pareva vero, a sti cafoni…
Facimmo doje regali a Luca Toni,
ca d’anne ormai ne tene ben trentotto.
A Mosca, mò, nun ve facite sotto!
*”Dai addosso al panzone!”