Nun se lusinga, ‘a povera Udinese.
‘O sape: si nun tene a Di Natale
po’ sta sicura ca ‘nce pav’e spese.
E’ chesto ca succere: tale e quale.

L’azzurre ‘e fanno ampresso cap’e mure.
Scenne Mertens, ca scagna cu’ Gonzalo:
nu rimpallo, e pe lloro so’ dulure,
‘o pallone s’insacca a fil’e palo.

Po’ raddoppia Manolo, ‘o Gabbiadini,
doppo nu taglio ‘e Marek (che bellezza!):
nunn’è nu gol, è un gioco da bambini.
‘O tiro è nu siluro, e abboffa ‘a rezza.

Nu pomeriggio senza chiù probleme,
pe mez’e sti stupende rete lampo?
Pe’ carità: accummenciano ‘e pateme,
e ‘a colpa ‘a tene tutta ‘o centrocampo.Inler ten’a paposcia, e nun se move:
Gargano è meno svelto d’o nurmale,
e accussì (le pigliasse nu catarro),
l’Udinese se sceta: è naturale.

Allan/ema: cherè, simme sparite?
Nun simme chiù na squadra commilfò?
Vuje, Britos e Rafè: ma che facite…
Ate fatto signà pure a Thereau!

Ma succere però ca stu frangese
o se cunfonne, o ten’a vista corta:
fa pure n’atu gol, int’a ripresa,
ma ‘a palla ‘a votta dint’alla sua porta.

Quarta vittoria. Mò tocca al Palermo,
ca sta jucanno buono, a stu mumento.
Al Barbera c’aspettano a piè fermo:
meglio accussì. Si fosse in movimento….