Napule: nun truvasse nu lavoro
nemmeno si ‘o pavasse a peso d’oro.
Chest’Italia è nu muorto ca cammina.
Pe’ tramente ‘o Natale s’avvicina,
e s’adda organizzà pur’o cenone…
Ma primma amma subbì n’umiliazzione:
accussì finarrà, simme sincere,
sta supercoppa contr’e bianconere.
A Doha song’arrivate chien’e grinta:
‘a squadra ‘e Carlos Tevez è cunvinta
‘e vencere. Nuje mò c’avimma fà?
Doje cose sole: chiagnere, e pregà.
E INVECE NO: L’AVIMMO MASSACRATA,
‘sta Juve. Pe doje vote, rimontata:
po’smuntata, definitivamente.
I che faccia teneva ‘o Presidente,
Agnelli: ch’è nu figlio di m…….
(nun ce stà n’ata rima cu Marotta….)!
Che te penzave, ch’ere juto in gita?
‘O Natale chiù bello ‘e chesta vita
Agnè: c’o rialaste, a malincuore.
Pe’ quatto vote l’uosemo: l’addore
d’a vittoria ‘o sentiste dint’o naso;
po’ perdiste. Vabbuò, nun ce fa caso….
Ma che bellezza, che suddisfazzione!
Chiellì, Buffon: magnatev’o limone.
Chistu Natale è proprio n’ata cosa:
primma era niro, mò è pittat’e rosa.
Penzanno a te, Higuaìn, stregnimmo ‘e diente,
e affruntammo la chiorma d’e pariente
cu nu surriso, cu benevolenza.
Bambinè, ce ‘nvitaste alla tua menza:
nuje tenevemo famma, e c’e sfamato.
E pe chesto, Tu sempe sia lodato!