Quanno alla fine l’arbitro ‘a siscato
dicenno ‘e jucature: ve saluto,
me pareva ca s’era pariggiato,
e invece no: stu Napule ‘a perduto.

‘A perduto pe chillu ritmo lento
pe tutt’a primma parte d’a partita.
E’ nu Napule muscio: corre a stiento,
comme si stesse ccà pe’ fa na gita.

‘A perduto p’o nuosto centrocampo,
ca – o vire! – nunn’è canchero ‘e mpustà.
Inler, Hamsik: c’avisseve nu lampo
ca dicesse a Gonzalo: va a signà!

Ma è pure pe bbia toja ca s’è perduto,
Higuaìn: troppo spisso inconcludente.
Tu cull’arbitro t’ea stà zitto e muto:
fa parlà chesti piere, eventualmente…
E po’ m’avita dì: cu qua curaggio
(nun ce mancava assaje: nu quarto d’ora)
‘a squadra pe’doje vote va in vantaggio,
e doppo manna tutto alla malora??

E’ pe chesto ca dico: caro azzurro,
‘a partita ch’e fatto nun me piace:
ncopp’a stu campo se pigliaje nu zzarro.
Vence Mazzarri: c’amma fa capace!