‘O dimane è un mistero: che sarrà?
Sulo na cosa, traggica, è sicura:
ogne partita, s’è capito già,
sarrà, da stu mumento, n’avventura.

Dicimmolo: ‘o grifone genoano
nun c’essa avuto mettere paura,
però vencettemo c’a lingua ‘mmano,
a na ‘ntecchia d’o sisco de chiusura.

Chi tene colpa? Aurelio: ‘o presidente.
“Stammo buone accussì: nisciun acquito,
al Napoli nun manca proprio niente”.
A Bilbao, e a Marassi, l’ammo visto…

‘A cosa è chiù ca chiara: è cristallina,
nun c’è bisogno d’aspettà dimane:
Rafaè, nun tiene ‘e  piere de Reyna,
e – scusa si t’o dico – manch’e mane….

Ncopp’a Maggio, ‘o Giudizio è Universale
(‘o saccio, spetta a te: scusa, Signore).
Nunn’è ca se po’ dì ca joca male:
nu gioca propio, e avessa restà fore.

E tu, Zuniga? Mò è passato n’anno
ca ce piglie pe’ culo a  tuttequante.
Pirciò, ca te pigliasse nu malanno:
si nun vuò stà cu nuje, lievete ‘anante.

Dummeneca, assafà, tenimm’a sosta.
All’orizzonte, ‘o Chievo: nu squadrone.
Aurè, stammo aspettanno na risposta:
o tiene ‘a serpe dint’o manicone??