Na vota overamente era na festa;
ca squase fino all’urdema jurnata
se lottava alla morte, testa a testa.
Ogge no. Sta classifica è sgranata:

‘a Juve vola verso ‘e ciento punte,
‘a Roma ‘a segue, sì: ma nun s’allanza.
E nuje? Nuje no: quanno saremo junte
Juve e Roma starranno già in vacanza.

E scennenno chiù abbascio, ‘a Fiorentina
se mantene a distanza rispettosa;
all’inizio curreva, mò cammina.
In Coppa sarrà certo n’ata cosa,
ma a stu punto remmane sulo chella,
e tutt’o riesto conta meno ‘e zero.
‘A sfida cu Mazzarri sarrà bella:
ce l’avimma leva da nanz’e piere.

Walter, te l’aggia dì: sì nu chiagnetta,
sempe a t’allamentà cu tuttequante.
Passat’a Coppa, niente chiù c’aspetta:
niente speranze e suonne delirante…

‘E juorne passaranno tutte eguale,
aspettanno ‘o calore d’a stagione.
Va buono c’accummencian’e mundiale,
ca però nun so’ niente, al paragone

d’e partite ‘e ll’azzurre: ‘a squadra nosta.
Nunn’abbassate ‘e gire d’o mutore,
pe copp’o campo datece risposta:
tenimmuce accussì, anema e core!