Guagliò, chist’è ‘o programma: inter/ferire
c’a squadra ca na vota era ’e Moratti.
(Pare ch’erano pronti all’inter/dire:
sti presidenti, so’ na vranca ‘e matti!)

Ma ncopp’o campo, chest’inter/azione
nun funziona. Ce sbatt’ o core mpietto:
l’Inter fallisce chiù de n’occasione,
pur’a Rafa ‘o vedimmo un po’ inter/detto.

Thohir tene doje facce, semp’e stesse:
bocca chiegata in basso, ‘a delusione:
o nu sorriso chieno d’inter/esse,
si ‘a squadra soja cumbina cose bbone.
Invece ‘e nuoste, sempe inter/mittente:
o accussì belle can  nun pare overo,
oppure musce musce: son(n)o lente.
Pe ce capì: maje niente per inter/o.

Alla ripresa, trame inter/essante:
Inler, ca nunn’è Inter pe nu palo,
ce strozza l’urlo ‘ncanne a tuttequante.
E mò vulammo a Roma, senza scalo!