‘O ciuccio sulla groppa tene ‘a soma,
‘o lupo fa paura: è cacciatore.
Nuje simme ‘e ciucce, ‘e lupi song’a Roma:
c’avessera sbranà, senza timore.

V’allicurdate ‘e Charms: ‘e caramelle
d’e tiempe antiche, cu nu buco in mezzo?
L’azzurre mò so proprio comm’a chelle:
tra ‘a difesa e l’attacco, manca un pezzo,

‘o centrocampo. Inler, Dzemaìli:
vuje site na menesta senza sale,
site doje burattine senza fili:
svizzeri, e pe stu fatto, neutrale.E Marekiaro? E’ triste: lo slovacco
pare na corazzata in avaria:
primma era na risorsa, mò è nu pacco.
Nun steva in campo: steva in agonia.

Mertens corre, ma sbaglia ‘e disimpegni.
Callejon pare molto affaticato,
Higuaìn porta nfaccia tutt’e segni
e chi dice: Rafè, miettece ‘a n’ato!

‘A Roma, ncopp’o campo, è Maramaldo;
‘o Napule fa pena: pare finto.
Ma quanno stanno priparann’o saldo
è uno ‘e nuje, chillo c’a mette ‘a dinto.

Canti e balli, e fernesce sta serata.
Loro hanno seminato, e nuje raccolto?
Si ve pare, è accussì. La Dea Bendata
s’è data (buono…) a nuje. Caso risolto!