Pareva ‘a fotocopia d’o Torino:
doje pallone int’a porta, in apertura
e ‘a vittoria è d’a nosta, è già sicura.
Vinte minute: è fatto, ‘o compitino.

Ma nunn’avimmo fatto propio niente:
‘ncap’ a cinche minute segna Castro,
nu nomme ca fa rima cu disastro,
e ce cundanna a n’ora ‘e turcimiente.

‘O Catania nunn’è ca  joca male:
annanze tene ‘a Kekko dei Modà,
ca pure si se sbatte, nun c’a fà:
tira in porta, ma è fallo laterale.

“Izco” nunn’è nu nomme,  è nu destino:
‘e “Zico”  è l’impossibbile anagramma.
Ma a vuje nun ve facette ‘a stessa mamma:
‘e chillu là, si sulo ‘o tappetino…

Il loro allenatore sbuffa e smania,
ma pur’isso c’azzecca ch’e parole
(‘a lengua batte dove il dente vuole):
“De Canio”, quattro settimi ‘e “Catania”…

‘E nuje che se po’ dì? Ca simme belli:
tuttequante ‘e passajeno, l’esami,
Uvini pure. E stu Valon Behrami
che sul campo cummanna, e fa sfracelli?

E mò aspettammo. C’ato se po’ fà?
Sta tutto dint’e piere della Roma:
nunn’è c’avissa propio andare in coma,
ma almeno se putesse addormentà!