So’ espansive, se sape, sti argentini.
S’abbracciano ogne vota ca se po’,
cuntente comme fosseno bambine.
Ll’ati parte d’o munno, invece no:

specie pe copp’o campo di pallone
l’abbraccio nunn’è cosa: è proibbito.
‘E fatto la figura d’o  c…..ne,
Fernandez. Né, nisciuno t’ha avvertito??

Stu veloce, giustissimo rigore
ce taglia ‘e cosce in senso generale.
Eremo fatte na partenz’e core,
ma po’ se decidette ‘e ce fà male.

Coccusarella avimme cumbinate
primma c’a squadra l’accusasse, ’o calo:
Callejon chillu gol nun l’ha signate
pe nu pelo: dicimmo, pe nu palo.

E mò? Quase sicuro stamme fore.
Pe fa tre gol all’arsenale ingrese
(‘o dicen’e classifiche, ‘e valore)
avessema jucà pe chiù ‘e nu mese…

Ncap’a na settimana, ammo jettato
int’o cesso, in veloce progressione
l’autostima, la Coppa, e ‘o campiunato.
I’ che triplete! Un vero un successone!