‘A nutizia è ‘a chiù traggica: Gonzalo
nun po’ giucà: remmane ancora al palo.
‘A partita accummencia fra n’istante
e tu, Higuaìn, si’ ancora latitante…
Grazziaddio, ncopp’o campo ‘a squadra regge.
Nunn’è ca se po’ dì ca detta legge,
ma sta cuperta, limitann’e danne.
‘A difesa cuntrolla senz’affanne,
e sulla destra è riturnato Maggio.
‘O Napule accussì piglia curaggio.
L’ommo è ladro si tene l’occasione?
S’arape annanz’a Pandev nu purtone,
ma (s’adda propio dì: mannaggiamorte),
‘o tiempo ce l’arrobba ‘o guardaporte:
De Sanctis (ca cu nuje perdette ‘a brocca
chiù ‘e na vota) remmane allerta, e tocca
finchè De Rossi vene a libberà.
Né Pandev, che t’e firat’e fà!
Poche minute ancora, e Lorenzinho
nun ce la mette, ‘a perla, dint’o scrigno.
Pe nu contrasto, Totti s’è struppiate.
‘E romaniste mò stanno nguaiate?
E invece ‘e giallorosse le va bona.
Britos se fa male, e c’abbandona
in mano a nu destino molto amaro.
Paolo, tu nun sì di canne avaro:
diciancello, guagliò. Che t’è fummato??
Se po dì ca  nunn’ere  ancora entrato
ca ncopp’ all’ivoriano ‘ e fatt’ o fallo,
e ce pigliammo ‘o gol. Tu pure ‘o giallo…
‘O Napule ce prova, int’a ripresa.
Nuje stamme ncopp’e spine, nell’attesa
d’o pari: e invece no, vene ‘o rigore
p’a Roma. Cannavà, facc’o favore…
A guardà buono, il fallo non ci stava,
ma tu invece d’e piere  ause ‘a clava….
Della serie: vulesse, ma non posso:
oltre al rigore, scatta pure il rosso.
E’  l’urdema illusione  ca se stuta:
chesta partita storica è fernuta….