E’ na città bellissima, Marsiglia,
patria di Jean-Claude Izzo (liegge: Izzò).
E’ nu posto ca molto c’assummiglia,
ma p’e tifose no: pe loro, no.

Ll’insulte contro Napoli, è na prassi
c’ormaje simm’abituate a suppurtà.
Ma ca c’anna tirà perfin’e sassi
è  na cosa ca nun se po’ accettà.

Si vulimmo parlà della partita
c’a sbrigammo cu poco, in doje parole.
‘A squadra di Marsiglia, tramortita
se squagliaje comme fosse neve ‘o sole.

Granda serata ‘e Mertens: un folletto
ca cumpare e scumpare: ma chi ‘o vere?
Callejòn fa n’acuto: un do di petto,
e stu Zapata, ma che bellu pere!

Doppo signato, steva stralunato:
nun se spiegava chello ch’eva fatto.
“Avite visto c’aggio cumbinato??”
(Mò ce chiere ‘o ritocco dell’ingaggio…)

Chi ha alluccato  ch’e nuoste so’ risorte
nunn’ha capito niente; s’è sbagliato,
pecchè l’azzurre maje so’ state muorte.
Se n’addona ‘o Torino, in campionato!