FIORENTINA-NAPOLI 1-2
30-10-13 - categoria Poesie in napoletano 2013-2014Ad Andrea Della Valle
Nel mezzo d’o cammino (è tosta, ‘a vita)
t’e ritruvato int’a na valle oscura,
c’a Fiorentina toja era smarrita.
A perdere accussì te sape addura,
cu sta squadra d’o Napule aspra e forte
ca te facette fottere ‘e paura,
e t’a fatto alluccà: “Mannaggia ‘a morte!”
Pe nuje se va nella città dolente,
pe nuje se va nell’etterno dolore,
cu tutt’e Della Valle tuoje pariente.
Occhei, te sì ‘ncazzato p’o rigore:
ma ‘e facettemo nuje, li cose belle.
Mertens e Callejòn, due gol d’autore:
può sta cuntento. Mò l’e viste, ‘e stelle!