A vencere, cu miezo Marekiaro,
poco Insigne, e cu Mesto ‘o post’ e Maggio,
ce piace ancora ‘e chiù: ce sta chiù caro,
e p’o futuro c’adda dà curaggio.

Se parte, e ampressa ampressa arriv’o crollo:
cinche minute, e ‘o riavolo va sotto.
A ce penzà, ce vene ‘o friddo ncuollo…
‘O Milan se trammea: na brutta botta.

Allè, te so’ venute e riscienzielli
(‘e convulsione…): ’e vist’e sorce verde?
Statte tranquillo: tien’ a Balotelli,
ca si piglie ‘o pallone, nunn’o perde.

Però perd’a pacienzia…Tene core:
puveriello, chiù ‘e chesto c’adda fà?
Tira, segna, però sbaglia ‘o rigore,
e nel finale se ne fa caccià.

Semp’uno a zero, fino a che Gonzalo
spara nu destro ch’è na scuppettata.
Abbiate nun prutegge ‘o primmo palo:
quanno capisce, ‘a palla già è passata.

L’azzurre mò so’ pronte p’o finale,
ma – comme succedett ch’e tedesche –
piglian’o gol. Guagliò, se mette male…
Vulite pariggà? Se, state fresche!

Doppo vintisett’anne, cà a Sn Siro
cu na partenza sprint (cos’e pazz!)
Milan, t’ammo jucato un brutto tiro.
Notte indimenticabbile, al Me-azz!!