A Roma se perdette. E che ce ‘mporta?
Pe nuje già era fernuto, ‘o campionato.
Mazzarri dice basta,  pigli’a porta,
e dal presente zompa int’o passato.

Chi se ‘ncazza, chi allucca “tradimento!”
‘o fa p’a delusione, ma se sbaglie:
quanno chi allena nun’è chiù cuntento,
chill’è ‘o mumento c’adda fa ‘e bagaglie.

Pe fa chiù meglio d’o siconno posto
ce vuleva ‘o scudetto sulamente,
(o ‘a Champions….): ma se sape, Aurelio è tuosto,
nun caccia ‘e solde pe l’investimente.

Te votte dint’e spire d’o Biscione,
l’Inter: la squadra ammazza-allenatore.
T’o magnarraje, chest’anno, ‘o panettone,
o a Natale già t’anno fatto fore?

Walter, pazziammo….Mò te ne sì ghiuto
luntano all’uocchie,  ma vicino ‘o core
pe sempe restarraje. Chistu saluto
è pe’ te, nuosto amato allenatore.

Luttanno a vote contr’o presidente
– ca  parlammoce chiare: mai t’amò –
‘e costruito un Napoli vincente.
T’avessimo tenuto n’atu po’,

ma tu diciste no: teniste duro.
L’erede già sta cà: trase, Rafè!
‘A dimanna se perde int’o futuro:
ce purtarrà alle stelle, comm’a te?

Da qualche giorno sei lontan d