Chello ca cont’e meno è la partita:
nuje ‘nparaviso, e ‘o Siena va all’inferno.
Chi è felice, e chi  no: ma chest’è ‘a vita,
accussì decidette ‘o Pataterno.

Na settimana ancora, e ‘o campiunato
comme quanno se stuta nu lampiere
fernesce dritto dritto int’o passato:
ma resta nell’annale, e int’e penziere.

“V’allicurdate di Gianluca Grava
(nu perfetto cugnomme da imperfetto!)
quanno ascette d’o campo? Se ne andava
nu piezzo ‘e storia nosta – nu pezzetto…”

Ma pure ‘e piezze gruosse se ne vanno:
Mazzarri, ‘o meglio dell’allenatore,
e ‘o capocannoniere de chist’anno….
A ce pensà, ce vene ‘o mal’e core.

‘A nustalgia ce piglia, e nun ce lassa:
tutt’e vittorie e mò, già so’ luntane.
Niente dura, se sape,  tutto passa:
ma quala squadra giocarrà dimane?

Chi c’o leva stu piso ‘a copp’o cuoll:
l’avimmo ancora, un Napoli vincente?
Chi c…. ‘e segna, tutte chille gol?
Ammo goduto: mò stregnimmo ‘e diente!