L’attribute, se sape, so’ maschili:
ce sta chi è tene, e c’è chi nunn’e tene.
Tu ‘e tiene, e te vulimmo troppo bene:
sì nu granne campione, Dzemaìli!

Sarrà sta Pasca, e st’alito divino,
ma comme giucatore, sì risorto.
Se sbatte assaje, ma tene ‘o fiato corto,
‘o toro. E’ piccerillo: è nu torino,

ma tre curnate pure ce l’ha date.
‘A siconna l’assecundaje Cavani,
ca trasette: “Guagliò, buttamm’e mani…”
Simme state sultanto sfortunate?

Gnernò: quello di Britos fuje n’errore
(a che stive penzanno?, a ‘o casatiello?)
Fernimmo sotto, e ‘o fatto nunn’è bello;
p’e tifose, è nu caucio dint’o core.

Po’ Cavani fa un gol capolavoro,
anzi due: punizione, e colp’e testa.
Te l’avimma cantà sott’a fenesta:
nun sì chiù matador, sì matatoro!