Int’a doje juorne, uà: tutt’è cagnato.
Sta Juventus fa troppe  tarantelle:
‘o campionato è apierto, è spalancato.
Conte e Marotta, nierve a fior di pelle.

Parma (o Pharma?, pe bia ‘e nu jucatore
cu nu nomme ca fete ‘e medecina:
Belfodil), ncopp’o campo butta ‘o core,
corre, se sbatte, sì: ma po’ s’inchina.

Doje portentose lance in verticale,
Dzemaili ‘o primmo, e Hamsik fa ‘a spaccata:
po’ Insigne fa na cosa eccezionale,
e a Cavani ce fa abbuscà ‘a jurnata.

Loro, ca se crerevano al sicuro
se so’ accorte ca no, nunn’è accussì,
e sbattono c’a capa dint’o muro.
‘E juventine tutte anna murì:

…detto, ovviamente, in senso (s)figurato.
Napule, nun te fa piglià d’a smania,
ea rimmanè tranquillo e concentrato:
sabato avimma battere ‘o Catania!