JUVENTUS-NAPOLI 2-0
20-10-12 - categoria Poesie in napoletano 2012-2013‘A partita è fernuta: è quase ll’ora,
e ‘o tifoso è cuntento: l’assapora
chistu pareggio giusto e meritato.
E’ nu Napule tuosto, concentrato.
Po’ segna ‘a Juve, e comm’a tanta scigne
“Primma: doveva entrare primma, Insigne!”
Tutte quante ‘ncazzate, a fa remmore
contr’a Mazzarri, ‘o nuosto allenatore.
‘A delusione, è overo, fà sballà,
però chesta è na granna ‘nfamità:
si era trasuto Insigne, dimme tu,
fors’a Juventus nun segnava chiù?
’O sistema ‘e Mazzarri era azzeccato:
era quase venuto, ‘o risultato…
* * *
Mò però s’adda fa n’atu discorso.
Forse dimane po’ venì ‘o rimorso
pe’ chello ca facimmo, per amore,
al gioiellino di Frattamaggiore.
‘A verità, signori cari, è chesta:
assieme ‘e piere, ce vo’ pure ‘a testa.
E a capa: ‘a testa, al grande Lorenzinho
‘e qualità forziere, e pure scrigno,
rischia ‘e zumpà: pecchè si ‘a lode è troppa,
‘o guaglione fernesce sott’e ncoppa.
Fa granne tenerezza, stu ragazzo:
cu chelli cuscetelle parte a razzo,
e nisciuno è capace ‘e l’acchiappà:
ma nunn’a passa maje, nun c’è che fa!
“Aggia fa gol adesso, primm’e mò,
e nun song’io: è ‘o popolo, c’o vò!”
E’ chiaro, nu se parla di Torino:
Pandev sbagli’o passaggio, e Lorenzino
nunn’o può propio prennere, ‘o pallone:
se riferisce a primma, sta questione.
Insigne è molto forte, a nuje ce piace:
ma nunn’è meglio si ‘o lassammo in pace??