Stongo assettato cà da chiù de n’ora,
e chistu piezzo nun me vene ancora.
Embè: ce vo pacienzia. I’ nun m’arrendo:
però scrivo “tremuoto”, e po’ “tremendo”,
e m’addimmanno: ma chi sa pecché
me vene sempe ncapa chistu tre?
Tremmammo comm’a foglie, noi tifosi.
Oramaje c’è venuta na psicosi:
ammo capito (cà nisciuno è fesso)
ca ‘o Napule è malato: sta depresso.
‘A quanno fuje cacciato a chella Coppa
nun s’è ripreso: la tristezza è troppa.
Penza a chello ca mò nun tene chiù,
e ‘a sta manera va sempe chiù giù.
Chi – manch’e cane! – avette l’occasione
‘e passà nu periodo ‘e depressione,
sape ca s’addiventa comm’a un sasso,
ca manca ‘a forza ‘e movere nu passo:
‘o juorno è niro, e nun fernesce maje.
Napule bello, ce rincresce assaje:
pe nuje pure, ‘a mazzata è stata dura.
Ma mò, la cosa che ce fa paura
(nun s’augura a nisciuno, arrassusia)
è e te verè accussì: senz’energia.
Nunn’abbasta na cura ‘e vitamina:
pe te fa sagliere ‘a serotonina
Mazzarri mò, mannaggia a chi l’è bbivo,
t’adda fà ‘e flebo di antidepressivo!