Doppo ca simme iute sottenCoppa,
ce vulessemo fà nu poc’e sosta:
dint’a ‘sti core la tristezza è troppa.
Ma na dimanna cerca na risposta:

simme martielle, o invece simme incudine?
A chistu beneditto terzo posto
putessemo arrevarce, in solit’Udine?
‘O friulano è n’avversario tuosto,

ma ‘o Napule accummmencia niente male:
occupa ‘o campo, tene mmano ‘o gioco,
e ‘a palla ‘a fa girà: ma quanno sale
in attacco cumbina overo poco.

All’intrasatta, arriva la surpresa:
Pinzi, c’annanz’a porta arriva sulo.
E pure cà, pe mezz’ d’a difesa
‘o Napule se fa piglià p’o culo.

Udinese: Pasquale e Di Natale,
è na squadra pe’ tutte li staggione.
Anche chest’anno cà se mette male,
‘o ciuccio, n’ata vota, miez’e suone.

Nunn’e tirà, sti calci di rigore,
Cavà: se vere, ca nunn’o  saje fà.
Ma pe’ furtuna tiene classe e core
abbastante pe’ farce pariggià…

Dopp’o fischio finale, Pozzo smania:
vulesse avè ragione, ma fa pena.
In campionato mò ce stà ‘o Catania:
ma primma, liberammoce d’o Siena!