Int’o gelo ‘e San Siro avimmo perzo.
Avimmo perzo un’ottima occasione
(ma ce serveva un Napoli diverzo)
contr’o Milan chiù scarso d’a stagione.

Né, chillu marcantonio superchiuso:
Ibra, ca fa nu sacc ’e gol ‘e tacco,
usa ‘a mano, tenennose annascuso
aret’a Nocerino: ‘i che vigliacco!

Ma pe’furtuna, ‘o guardalinee ‘o vede.
A chistu punto ‘o Napule che fa?
Attacca, se scatena? No: se siede,
e nu sfrutta la superiorità.

Occasione sprecata. Che peccato!,
ma stammo tuttequante fore palla.
C’avimma fà? Scurdammoce ‘o passato:
ogge ce limitammo a stare a galla!