Firenze ce faceva assaje paura,
e ‘a justifica steva bell’e pronta:
“nun s’è pututo fà bella figura,
ma pensavam’a Coppa: chella, conta”.

E invece fuje vittoria, e che vittoria!
P’a squadr’e Della Valle, un brutto tonfo.
‘O Napule strafà, joca a memoria,
e chiù ca nu successo,  è nu trionfo.

Mò ce chiedimmo: comm’è capitato?
Fors’è ‘o caso e ce chiedere’o pecchè
stu Napule scadente e scalcagnato
s’è scetato, e de gol n’a fatte tre.

‘A spiegazzione c’a pò dà Cavani:
“E chella è stata ‘a palla, chè rotonna”.
Bravo, Cavà: fatte  sbattere ‘e mani…
Intanto p’e gigliate è notte fonna:

pe stu murtificante risultato
so’ rimaste trammiate, overo scossi.
Segna Lavezzi: Jovetic sul bagnato.
Tu mazzeca sta gomma, Delio Rossi!

Sarrà ca ce ‘mpurtava poc’e niente,
sarrà c’anno jucato ‘e titolari:
martedì, né guagliò, tenite a mente
ca site ciucce: ciucce, no somari!

Valid XHTML 1.0 Transitional Valid CSS!