Villarreal, che splendida città!
Comm’abitante so’ cinquantamila.
Si cirche nu problema, nun ce stà:
traffico poco, nun se fa na fila,

propio comm’addu nuje (!), tutto funziona.
Ajere funzionava pur’o calcio,
però doppo fermette ‘a sciorta bona:
se struppiaje Rossi, e fuje ‘o primmo intralcio.

Po’ doppo tutt’o gruppo è ghiuto in stallo,
e nun so’ chiù venute ‘e risultate:
e s’affunnaje, ‘o sottomarino giallo.
‘A storia è chesta ccà, bellrofrate:

comme fa chiù, na squadra provinciale
a se fa largo, e a rimanere in alto?
Ca c’a faceva ‘o Napule, è normale:
nunn’abbastan’e solde, per il salto

‘n paraviso, però si nunn’e tiene
(insieme alla bravura, e alla fortuna)
‘e voglia a fà preghiere e a fà nuvene.
Si mò guardammo ‘e cose a una a una,

se po’ dicere: avimmo meritato.
Venette pur’o tiempo d’a paura,
ma ‘o Napule nun s’è mai scuraggiato:
se diceva “sta notte sarrà dura”,

e ha stritto ‘e riente. Mò po’ sta cuntento:
è ghiuto annanze. ‘A squadra arrivarrà
a chillu punto addò la porta ‘o viento:
ma a stu mumento, che felicità!