Fa cauro, comme fossen’e vacanze,
ma stamme tutte chiuse dint’e stanze
cu l’uocchie fisse sul televisore:
stasera  s’accummencia, e sissignore!

Senza  pallone (‘a situazione è nota)
‘a quatto mise, overo stamm’a rota:
e ‘a partita fra ‘o Napule e ‘o Cesena
mò ch’è arrivata, cià sparammo in vena.

‘O Pocho, già se vere, tene voglia;
ncopp’all’out, a Ravaglia l’arravoglia.
‘O liscio è la bandiera ‘e stu paese:
forse pe’ chesto abballano, ‘e difese.

Inler, Dzemàili: sì, so’ belle quanno
attaccano: ma diga nun ne fanno.
Certo, ca so’ eleganti da vedere,
ma se fann’ infilà ch’è nu piacere.

Pe doje-tre vote s’è rischiato ‘o peggio,
ma poi il Cesena ‘o piglia, stu pareggio.
Si l’arriva a tenè? No, manch’e cane!
Squillan’e trombe, sonan’e campane,

ca diceno: stu Napule è corsaro!
Chi ‘e sona? Fra Martino Campagnaro…
Tranquille d’o vantaggio, ‘e nuoste azzurr
(cherè sta maglia gialla? Stamm’o Tour?)

jocano lisce. Ma pe stà sicuro
segna Marek: e a Cesena se fa scuro.
E’ accummenciata bona, chesta guerra:
miercurì, la battaglia d’Inghilterra!

Valid XHTML 1.0 Transitional Valid CSS!