Dopp’ a brutta nuttata contr’o Chievo
ce turmenta nu dubbio, nu penziero:
è accummenciato ‘o buio, ‘o Medioevo?
Ma però dura poco, stu mistero:

‘o Napule ce stà, tene gulìo
(fernesca ‘nfieto chi ce vott’a seccia!):
primma sfiorammo ‘o gol, po’, grazie a Dio
Hamsik- Maggio – Cavani, e part’a freccia

ca fa sicco stu cancher’e Cesena;
tuosto, ca nunn’a mette, ‘a barricata.
‘O Napule insistisce: pare in vena,
e dopp’a primma rete, ne fa n’ata,

ma ‘o guardalinee nun se po’ guardà.
(Mò c’o lassan’a casa quacche mese
tene ‘o tiempo e se legge “Cecità”,
‘o libro d’o scrittore purtughese…)

Ma nun c’annervusimmo, pe sta cosa:
continuammo a ghì annanze, ad attaccà.
E quann’a fine segna pure Sosa (!),
è n’esplosione di felicità.

Sabato sera, che succedarrà
contr’e tante campiune di Ranieri?
Dice: “ ‘A partita della verità”:
ma – chest’è overo – ‘e vuje già simme fieri!

[youtube]http://www.youtube.com/watch?v=uMLAKbaO8hY[/youtube]