‘O posto è ‘o stesso, ‘a differenza è tanta:
Inter e Milan, pure Roma e Lazio,
comm’a dicere: diavolo e acqua santa.
Chi va dall’una all’ata, pava dazio.

Ma spisso, giucatori e allenatori
c’hanno fatto stu salto, se so’ visti:
na vota se diceva “traditori!”,
e mò se chiammano professionisti.

‘E case so’ parecchie. Ma ‘o chiù bello:
‘o chiù elegante, ‘a meglia parlantina,
è Leonardo, che da Milanello
s’è trasferito abbasci’a Pinetina.

Spisso, quanno ripiglia ‘o campiunato
‘o Napule nun pare ancora pronto:
c‘a capa sta in vacanza. Sta stunato,
e l’avversario lle presenta ‘o conto.

Accussì va: sul prato di San Siro
c’hanno dato nu cuofen’e mazzate.
Napule bello, t’hanno fatto niro!
E sperammo ca mò te si scetate…

L’occasione ‘e nu rapido riscatto
‘a tenimmo. Ce vene presentata
bella cavera, proprio ncopp’o piatto.
Arriva na Juventus acciaccata

(nun tene Quagliarella, e manco Melo),
cu ll’uocchie spalancate d’a paura.
Dummeneca guagliò, p’ammor’o cielo,
mica ce date n’ata fregatura?

[youtube]http://www.youtube.com/watch?v=JGPnuAKav2E[/youtube]

Tags: 2011, inter - napoli 3-1