NAPOLI-STEAUA BUCAREST 1-0
15-12-10 - categoria Poesie in napoletano 2010-2011Simme turnate ‘a casa ch’e catarri,
ma che fa: ce pigliammo n’aspirina.
E’ luntano d’a squadra, oggi, Mazzarri:
squalificato, nun po’ sta in panchina.
Cu isso, int’a tribuna, c’è Lavezzi,
ca stasera sapimmo addò s’a fa:
nun po’ giucà (ten’a caviglia a pezzi),
ma almeno nun fa danne giù in città.
Ce l’ammo fatta, sì: ma nculonculo.
Dicimmolo, stu Napule nun brilla.
‘A puteva risolvere isso sulo:
Cavani, c’a appicciato la scintilla.
E accussì, stu girone è superato.
Nun sapimmo si è buono, o è malamente:
si ‘sti sfuorze ‘e pavammo in campionato?
Po’ se vere. Gioimmo, pe’ tramente!