Ncopp’e panchine, derby livornese.
Mazzarri, “ommo d’o sud”, è  chiù sanguigno,
mentre Allegri vulesse fa l’inglese.
In più, rispett’a nuje, tene a Robinho,

ca bell’e buono sblocca ‘o risultato.
Nuje stamme tutte addietro, a surviglià
Ibrahimovic (anema longa), e  Pato,
senza tenè ‘o curaggio d’attaccà.

E chest’è niente; doppo na mez’ora
russo a Pazienza. Statte buon’e sante:
è ghiuto tutto stuorto, e che malora!
Sarrà nu paliatone, ma pesante…

E invece mò accummencia la battaglia.
‘O ciuccio l’ha sentute, sti frustate,
e se vò ribellà:  mozzeca, raglia.
Abbiati fa nu cuofen’e parate.

‘O pareggio ce sta: nunn’è miraggio,
ma c’avimma scuprì, chest’è normale,
e ‘o svedese accussì ce fa rammaggio.
Lavezzi fa nu gol eccezionale,

ma è tarde. Na nuttata d’amarezza:
continuammo cu chesto su e giù.
Jamme, Napule: miez’a sta munnezza
ce rimanive sulamente tu!

[youtube]http://www.youtube.com/watch?v=ekmBI_TDH00[/youtube]

Tags: napoli-milan, onapule, ottobre 2010