So’ scure, luonghe e fridde, sti nuttate.
Si pure sponta, ‘o juorno è assai luntano,
e mò ca se ne va pure Saviano
overo stamme buone cumbinate.

Ma nun semp’a nuttata è dura e amara
(a vote vinc’o Bene, e perd’o Male),
e aiere c’a mannato nu regale
che la facette addeventà chiù chiara.

Ce mancava ‘o coraggio d’o sunnà:
’a Juve, poco fummo e nient’arrosto.
Doppo diciassett’anne, ‘o primmo posto:
è overo, ll’ate ancora anna jucà…

Staremo annanze sulo pe’ na notte,
ca dimane ce fanno tuttequante,
Lazio, Udinese e cumpagnia cantante?
Ma va buono accussì, che ce ne fotte!

E invece (bello!) nun fernesce ‘a festa:
pareggia l’Udinese, e stu Bologna
suffonna ‘a Lazio (Rossi, che vergogna!):
a sera doppo, stamm’ancora in testa.

Po’ l’Inter vatt’a Roma, e se ne fuje.
Sulo vintiquatt’ore, fuje n’assaggio.
Ma cu chesto Lavezzi, e co’ sto Maggio
‘o posto loro, c’o pigliammo nuje!