Se sape can nun sempe po’ ghì bona,
e can nun sempe ce pò ghì deritta;
dopp’a magra figura di Lisbona
pure in Italia arriva la sconfitta.

Tu, Genova, ca pure tien’o puorto,
ca sì ‘a patria ‘e l’Acquario, e d’e camalle,
assaje spisse c’e fatte quacche tuorto,
e chiù ‘e na vota c’e pestat’e calle.

Era ‘o mumento d’o pavà, stu costo:
s’eva stutà, sta luce troppo accesa.
Comm’o mantiene, nu siconno posto
quann’ areto tenimmo sta difesa??

Pigli’o secondo gol dei rossoblu:
è n’esempio ca pò servì a puntino.
Milito (è n’ir ‘e Dio, l’è viste tu?)
doje ne strunzea, po’ passa a Palladino.

E o’ terzo gol? Oi mamma, e quant’è bello!
Semp’isso, ch’è na spada dint’e rine,
colpisce ‘e capa, a un metro da Gianello,
ca sta jucanno a ‘e belle statuine.

Hamsik: tu nun s’ i  ceco, ma si’ zuoppo!,
e sta canzone va pe tutte quante.
Pe chesto, o risultato è pure troppo
generoso: eva esse chiù pesante.

Direttore Marino, te lamiente:
“L’arbitro c’ha negato doje rigore!”
Tiene ragione, è overo: sissignore,
ma stu fatto però nun cagna niente.

Se salva sulo ‘o Pocho: male Maggio.
Fuje na durmuta quase generale.
Mò tirammolo fora, stu curaggio
‘e dicere ca s’è jucato male!