‘A primma ci andò male? E nun fa niente.
In Coppa Italia è ghiuta annanze ‘a Lazio?
Napule, nun dà retta, e stregne ‘e diente:
chesta vota ‘e facimme pavà dazio.

‘O campionato è tutta n’ata storia.
C’avimma menà annanze, a testa bassa.
Nun ce sta tiemp’a perdere: ‘a vittoria
l’avimm’acchiappà  subito, si passa.

Pochi giri facetten’e lancette
d’o rilorgio: nu cinche, sei minute,
quann Hamsik t’a sistema dint’o sette.
Lazio, nun t’abbelì! Pienz’a salute!

‘O San Paolo esplode: ‘i ch’allerezza!
Cu sta rete signata ampresso ampresso
ce putimmo scurdà tutt’a  munnezza
‘e sta città, c’addeventaje nu cesso.

‘A Lazio se trammea, però nun more.
Nun se chiure, riparte chianu chiano.
Ledesma (pare ‘o nomme ‘e nu tumore)
pareggia  cu nu tiro  da luntano.

Po’ doppo in area s’apprisenta Pandev,
quest’animale a rischio d’estinzione
ca fa  n’azione veramente grande,
e ‘o mette dint’all’angolo, ‘o pallone.

“Rossi, ‘e chesta vittoria nun sì degno!”
alluccano arraggiate ‘e spettature,
e parte ‘a guainella; ‘o tiro a segno.
P’e povere laziale, so’ dulure.

A Napule tenimmo ‘o sole, ‘o Marek,
ed Ezequiel: cu loro ‘a palla scotta:
‘o portiere scunocchia, ma nun care:
ma quanta palle piglie, né Ballotta??

Asso nun sì, però sì pigliatutto:
‘e miette  a tutte parte, ‘e mane toje.
E tiene pure (scusa), ‘o ….rutto…
Ma n’ato t’o facimmo: è doje a doje!