Nun ce sta nient’a fa: so’ tropp’astute,
troppo scafate, chesti juventine.
Diciassett’anne e chiù se ne so’ ghiute,
e l’amme avute sempe aret’e rine.

Accussì, quanno segna Pinturicchio
è nu caucio mmocca: na mazzata.
Comme si ce vuttasseno nu’ sicchio
d’acqua fridda; ma che, d’acqua gelata.

Dice ‘o proverbio antico: dice ’o saggio
c’a sciorta toja si’ tu: niente te tocca.
Chi nun tene na vrenzola ‘e curaggio
cu na femmina bella maje se cocca.

E che curaggio tene stu Gargano!
S’azzecca ‘a pall’o pere, e va sicuro;
trase pe dint’all’area, e a copp’a mano
cu tutt’a forza spara nu siluro.

‘O Napoli ‘o riacchiappa, stu pareggio.
Che gioia, pe migliaia ‘e spettatore!
Dice ‘a Juve: meglio chesto ca peggio,
ma dopo un po’ ce danno doje rigore

uno chiù assurdo ‘e ll’ato. E’ ‘o tre a uno:
si ajere ce l’avissen’annunziato
nun c’avisse creruto maje nisciuno.
Quanno, alla fine, l’arbitro ha siscato

simme felice assaje: troppo cuntente.
Doje rete regalate, ncopp’a tre?
Certo, ‘e rigore  sono inesistente,
però: vint’anne a te, na vota a me!